Drei Mundartdexde...
25.3.2014, 09:17 Uhr
Di Könichin vo dä Hummlschdrass
In maaner Eingschafd als Zivi hobbi hald vyll mied alde Leud zu dou. Do gibbds scho amol Zoff. Vor allem, wenn die maanä, sie könnä mir dauernd neigaggern mied ihrä Lehmserfahrung und mir sohng, wäi i wos wäi und wozu richdi machen mou. Dabei binni mied maane zwanzg Jährlä doch aa auf dem Trip, dass i denk, iich hobb maane Weisheidn mibm Löffl gfressn.
Jeden Freidooch muss i also zu anner Fraa, die ned umäsunsd in dä Hummlschdrass wohnd – so wepsäd wäi die is. Des is a solch anne von der Sordn, dassd nix richdi machen kannsd und immer des falsche einkaufen dousd oder verkehrd pudzd, aa wennsd fünfmol am Einkaufszeddl schausd und jeeds Staubkörnlä mit der Zungä aafschleggsd.
Irchendwann is mä hald aa zu bund worn, als i ihr helfen wolld, änn schwern Wasseraamer zu schlebbm und sie mich mit den Worden „Du bleibsd wosd grod stehsd!“ auf meim Pladz fesdwurzln wolld.
Do hobbis dann ohgschaud und ihr gflüsderd, dass i fei ned ihr Hofhund bin.
Für änn Bruchteil anner Sekundn iss zammzuggd. Dann hodds miich widder däbaggd: „Doch, genau des bisd. Und wennsd edz nu bellsd, krigsd ä Stück Worschd!“
Wie, frooch i di, will män su anner Fraa bös sei?
An di Donnersdooch in dä Frähi um Elfä
An die Donnersdooch um elf binni immer bei anner Nainzgjährichn tädich, für anderdhalb Stund. Mei Läiber, dey nimmd di her. Do hasd Bad pudzn ned einfach durchwischn, sondern Glo, Wannä und Spiegl saibern. A des Staubsauhng is ned des Übliche. Do moussd alle Möbel wechruggn und ganz hindn in die Eggn neikummä. Dann gibbds dä änn Einkaufszeddl, wousd goar ned auf die Idee kummsd, die Kilo, diesd vom Laden widder hamm schlebbsd, auszurechnä. Trodzdehm schaffsd däs meisdens in ä Stund, dassd mit allem ferdi bisd.
Dann strahls di oo, kochd Kaffee und stelld Blädzlä am Diesch, obber nix kaffds, selber baggne.
Sie fängd äs redn oo und du redsd mied und merksd, dass di Fraa nu am Lehm is. Sie erzähld dä vo ihrm Moo, der seid dreißg Johrn undä dä Erdn lichd und wie archs verliebd woar in ihn, zu Anfang. Sie sprichd vo ihre Kindä und Enggala, wo bald nu ä vierds unterwegs is, und du wundersd diich, dass die so zufriedn is, trotz der Schiggsahlsschlääch im Kriech und dem Krebs vo ihrm Moo, der schließli änn seim Tod schuld woar.
Späder erzählsd selber äweng wos von dir und sie horchd dä zu, trauerd mit dir, dass dei Fraindin Schluss gmachd hodd, wousd doch dachd hasd, des klabbd mit derer wie mit kanner andern vorher, und hodd immer wos doozou zum Sohng. Aber nix gscheids – was netts.
Und dann sinds widder rum, die anderthalb Stund. Und du fraisd di über des Tringkgeld von anner Margk mehr, als über die zehn Margk, diesd von derer andern Frau griggsd, wousd blouß zehn Minuddn wos eikaufen dousd und widder in Bus neisteigsd und zur Zendrohle fährsd.
Unnödiche Sauberkeid
An di Miedwoch binni manchmol bei derer tädich, die ihr Wohnung voll Gruuschzäich hodd, obber si aa ned trennä kann von dem Graffl, denn „ä Griech“, wies maand, „is bisher nu alle fuchzg Joahr vorkummä.“
Wie iich äss erste Mol bei ihr gwesn bin, hobbis hald scho probierd und sie gfrochd, obbi äweng Ordnung machn und des Gwerch derwall auf änn großn Haufn in ä Eggn ins Wohnzimmer schlichdn däff.
„Naa“, hodds gsachd und di Händ zammgfald, „bittschön ned, des brauch i alles, wies edzädd doo stehd.“
Also hobbi zum Wischn oogfangd, miich gärcherd und ä halbe Stund länger brauchd wieäsunsd. Dä Bus, dä Neunävierzgä, der zur Zendrohle fährd, is zwischenzeidlich natürlich wech gwehn und iich bin ä Vierdelstund umänandergsessn, obwohl mir dä nächsde Einsatz scho aff die Nägl brennd hodd.
Ä Wochn späder binni widder bei derer eideild. Walli scho gwussd hobb, was miich erwardn doud, hobbi mi vorher mendahl draff eigstelld. Dabei is alles ganz anders kommä.
„Ihre Kollechn“, maands und schaud miich verstörd oo, „hamm mit mir änn Spaziergang gmachd und danooch woar di Wohnung leer.“
Eibrochn werd wohl kanner sei, hobbi mä heimli denkd und mei Ärberd verrichd, ohne dass mä ä bisslä gfalln hädd.
Keine Kommentare
Um selbst einen Kommentar abgeben zu können, müssen Sie sich einloggen oder sich zuvor registrieren.
0/1000 Zeichen