Schbielraddzn-Gedichte

Das Thema Spiel inspiriert in diesen Wochen die Autoren der literarischen FN-Reihe. Fitzgerald Kusz hat das Wort. Der Nürnberger aus Leidenschaft ist Dramatiker („Schweig, Bub!“), Lyriker, (Dreh-)Buchautor, PEN-Mitglied, Rezensent und mit seiner Mundart-Kunst, die Poesie und Realismus treffsicher miteinander verknüpft, seit mehr als drei Jahrzehnten eine feste literarische Größe.

Vorbemerkung:

Wenn man das Schiller’sche Diktum, wonach „der Mensch nur da Mensch ist, wo er spielt“, ernst nimmt, müssten alle wahren Menschen sofort anfangen zu spielen. Oder, um es fränkisch auszudrücken, zu „Schbielraddzn“ werden. Im Spiel wird man ein anderer. Das können wir von den Kindern lernen. Sie betreiben ihr Spiel mit einer wahren Ernsthaftigkeit und vergessen dabei alles um sich herum. Im Spiel können sie sich in alles Mögliche verwandeln und in der Spielrealität aufgehen.

Die nun folgenden Gedichte verdanke ich meinen Kindern, als sie noch in diesem wunderschönen Alter waren, das leider viel zu schnell vorbeigeht. Aber Gedichte können ja die Zeit anhalten, sie sind selbst ein Spiel, ein Sprachspiel.

schbielraddz

dä aungblick

wou sei babiäfliichä

in dä lufd bleibd

isn läibä

wäiä ganzä dooch

schbielraddzn I

es billichsde schbielzeich binni

selbä:

iich brauch mi blouß buckn

und bräisälä vom buudn aufhehm

und scho grabbeld die lisa aff mein

buckl

und maand, iich bin ä gaul

sie häld si an meim hemmerd-

groong fesd

und wenns dann „hü“ sachd

moui su lang ibern debbichbuudn

reidn

bis widdä „brrr" hassd

und dann moui schdäihbleim und

wiehern

wenni broov bin, gäihds mer goud,

nou gräichi ä boä schussä zum

fressn

schbielraddzn II

manchmall is eiä zimmä goä

nimma eiä zimmä.

dann derfi ned ämall mehr affm

debbichbuudn schdeing,

weil des grood es „meer" is.

und deä beddvuurlechä is eiä

schiff.

ihr hockd aff eire kindäschdühllä,

fuchdeld midderm

doudnkubffähnlä umänandä

und seid zwaa piraten...

manchmall is eiä zimmä goä

nimmä eiä zimmä.

middn am hellichdn dooch habdä

inn

rolloo roogloun und schbield

gschbensdä

mid alde beddäichä.

und dass ned ganz su schduuck

finsdä is,

blidzd ab und zu dä schdrohl

vo eire daschnlämblä auf...

manchmall is eiä zimmä goä

nimmä eiä zimmä.

dann is blouß nu ä krankenhaus,

und ihr zwaa seid di dokdä

und behandeld eire schdoffdiere.

dä teddybär werd innä deckn ei-

gwickld,

dass sei fieber widdä vägäihd

und es nilpferd mou dauernd „aah"

soong...

manchmall ist eiä zimmä goä

nimmä eiä zimmä.

obbä schäi wärs aa,

wenn es auframmä nach suerm

schbiel

aa ä schbiel weä...

1. verwandlung

iich möchäd ämall ä zwerch saa

ä zwerch mid ä roudn zibflmüdzn

und emm langä weißn boäd

iich hädd ä gflickds jäcklä oo

und ä alde zrissnä husn

obbä des machäd miä nix aus

weili hald ä zwerch weä

iich möchäd ämall ä zwerch saa

iich laafäd durch di laid iä baa

und väschdeckäd mi innerm aamä

dann findädns mi nie im lehm!

iich möchäd ämall ä zwerch saa

obbä in emm gaddn womöchli nu

nebä emm goldfischdeich

des weä ka lehm fiä miich!

2. verwandlung

iich möchäd ämall ä gschbensd saa

dann könnädi am dooch schloufm

und in dä nachd rumgeisdern

iich hängäd mä ä beddouch um

und schbridzäd kedschabb dribä

dann denkädns des weä bloud!

iich möchäd ämall ä gschbensd saa

iich laafäd midm kubf underm arm

rum

und zäichäd ä eiserne keddn hindä

miä heä

dass nä su schebbern dennäd!

iich möchäd ämall ä gschbensd saa

dann häddi ä schdimm su rauh

wäi ä rosdiche düäangel

iich brauchäd blouß „ui-ui" schreiä

und scho laufäds alle laid

eiskald inn buckl nundä

iich möchäd ämall ä gschbensd saa

obbä nachd fiä nachd

di laid angsd eijoong

iich waaß ned

ob des aff di dauä ned zu

oonschdrengend für miich wär

3. verwandlung

iich möchäd ämall ä denkmol saa

und afferm podest schdäih

obbä ned middn afferä schdrassn-

kreizung

wou di audo an miä vobeiraserdn

und woui mä mei nosn zouhaldn

mäisserd

dassi kanne ausbuffgase einatmerd

iich möchäd ämall ä denkmal saa

obbä blouß innerm bark

wous bamm und blummä geberd

und ä schbielbladz in dä näh wär

dann häddn alle laid und kindä

zeid

dass aa zu miä raufschauerdn

iich möchäd ämall ä denkmol saa

wos fiä anns des weä mä ganz

egohl

haubdsach iich schdennerd

afferm schäinä podest aus schdaa

vo demmi aff di laid nundäschauä

könnerd

und däi mäisserdn zu miä rauf

schauä

mehr braucherdi eingli goä ned

iich möchäd ämall ä denkmol saa

obbä obbi mä aff di dauä

es lachn väbeißn könnerd

des waassi fei ned