mei kindheid
13.5.2014, 10:16 Uhrmei kindheid
des is des frigeo-brausebulfä
wossi mid meinä schbodze
vo meinä händ gleckd hou
mei kindheid
des is mei blasdik-indioonä
wou aff seim musdang
ibä di brärie galobbiäd
mei kindheid
des is di lebberi aff dä schdrass
woui nacherm warmä gwiddäreeng
barfeddz drin rumghubfd bin
mei kindheid
des is deä unväwüsdliche schliddn
mid demi bauchädsi
inn berch nundägsausd bin
mei kindheid
des senn däi selbägfangnä maiäkäfä
innerm schouhkaddong
mid lufdlöchä drin
mei kindheid
des is dä besdioolische gschdank
vonnerm odelwoong
wou an miä vobeigfoän is
mei kindheid
des is des väschdeckäläs-schbiel
wou mi kannä gfunnä houd
weili mi su goud väschdeckd hou
mei kindheid
des is des foärood vo meinä muddä
mid demi mi beinooh am nachbarn
seim gaddnzaun dähudzd hädd
mei kindheid
des is däi zinkboodwannä
woui jedn samsdooch
drin badd worrn bin
mei kindheid
des is dä bou assm struwwelpeter
dem wou dä schneidä middä scher
inn daumä oogschniidn houd
mei kindheid
des is des koddledd
su grouß wäiä abbodddeckl
wossi bamm medzgä ghulld hou
mei kindheid
des senn däi bubbl
woui midm klann fingä
ass meinä nosn gfischd hou
mei kindheid
des senn däi rolläfässlä
wemmä in dä sandgroum
cowboyledz gschield hamm
mei kindheid
des senn däi grind
vo mei aufgschürfdn knäi
woui immä wechkradzd hou
mei kindheid
des is di milchhaud
aff meim kaba in däi fräih
vuä deäs mä immä geekld houd
mei kindheid
des senn däi wundädiidn
mid buffreis fiärä zehnälä
wou nie ä schadz drin woä
mei kindheid
des senn däi schouh
woumä nach emm joä
scho widdä zu klaa woän
mei kindheid
des senn däi bundn kaugummibildlä
inn kaugummi houi ausgschbodzd
di bildlä houi bfaldn
mei kindheid
däi ghörd miä ganz allaans
däi kammä kannä nehmä
däi werri nimmä lous